• O Consello de Administración de Xestur autorizou a semana pasada a licitación do contrato
para executar a Fase A-1, un ámbito de 25.121 metros e 15 parcelas
• Os traballos previstos terán un prazo de execución estimado en oito meses
Santiago de Compostela, 26 de febreiro de 2021.- A Consellería de Medio Ambiente,
Territorio e Vivenda sacou hoxe a licitación as obras de ampliación do polígono empresarial de
Muimenta, no concello lucense de Cospeito. O contrato sae por un importe de 1.332.400,55 euros,
máis IVE, e o prazo establecido para a execución dos traballos é de oito meses, segundo consta nos
pregos.
O Consello de Administración da empresa pública Xestur acordou na súa reunión da semana
pasada aprobar a licitación destas obras, que inclúen concretamente a separata do proxecto de
urbanización, electrificación, alumeado público e rega da ampliación do parque de Muimenta fase
A-1.
O contrato, licitado mediante procedemento aberto e tramitación ordinaria, permitirá
desenvolver a primeira das tres fases nas que se dividirá a ampliación do devandito polígono co
obxectivo de sumar un total de 145.269 metros cadrados máis a esta área empresarial e 56 novas
parcelas.
A chamada Fase A-1 licitada hoxe terá un total de 25.121 metros cadrados dos cales 12,979
metros cadrados se reservarán a usos industrial e comercial. As parcelas previstas neste ámbito son
un total de 15, cun tamaño de entre 700 e 1.525 metros cadrados.
Cómpre lembrar que o parque empresarial de Muimenta, en funcionamento desde o ano 1999, foi
promovido por Xestur. Ten unha superficie bruta de 37.000 metros cadrados, dos que 27.458 son de
uso industrial. Esta superficie repártese en 22 parcelas (todas elas vendidas, de aí a necesidade
da ampliación) que van dos 480 aos 2.709 metros cadrados.