• O ámbito desta actuación, que foi adxudicada por un importe superior aos 3,7 millóns de
euros, comprende máis de medio millón de metros cadrados, dos que aproximadamente 316.000 serán
parcelas de uso industrial e comercial
• Estes traballos sumaranse ás obras xa executadas nos últimos meses para a explanación da
plataforma K-3, a execución do Eixo 0 e o acondicionamento da estrada DP-0512, que constitúe un dos
viais do polígono
• Trátase da maior actuación de solo empresarial que está a acometer a Xunta no norte de
Galicia, cun investimento en dous anos que supera os 12 millóns de euros
Santiago de Compostela, 21 de decembro de 2018.- A empresa pública Xestur,
dependente da Consellería de Medio Ambiente, Territorio e Vivenda, vén de asinar o contrato para a
realización das obras de urbanización interior da primeira fase (A) do parque empresarial de Morás,
no Concello de Arteixo. Coa execución destas actuacións permitirase a implantación das primeiras
empresas que xa teñen solo adxudicado en Morás, a maior actuación de solo empresarial que a Xunta
está a acometer no norte de Galicia.
A obra foi adxudicada á empresa Acciona Construción S.A. por importe de 3.745.177,27 euros
(IVE incluído) e o prazo de execución previsto é de oito meses. A urbanización da primeira fase do
parque comprenderá unha superficie total de máis de 554.000 metros cadrados, nos que se obterán
aproximadamente 316.800 metros cadrados de superficie destinada a parcelas de uso industrial e
comercial e que contará con máis de 3.800 prazas de aparcamento.
Nesta primeira fase está incluído o terreo destinado ao emprazamento dos depósitos de auga
que darán servizo á rede de abastecemento, rega e hidrantes e no que se instalará a subestación
eléctrica que servirá a todo o parque empresarial. Tamén inclúe os espazos destinados á execución
dos estanques de regulación de augas pluviais.
A fase A do parque empresarial de Morás contará con máis de 60 parcelas de uso industrial e
comercial, con superficies que irán dos 1.000 aos 105.000 metros cadrados. Ata o momento, xa foron
adxudicados 105.000 metros cadrados á empresa Aluman e máis de 43.000 metros cadrados a antigos
propietarios de solo no ámbito do parque.
Coa execución dos traballos de urbanización da fase A do polígono de Morás, o investimento da
Xunta de Galicia nesta gran área empresarial nos dous últimos anos supera xa os 12 millóns de
euros.
Obras rematadas
As actuacións de urbanización que acaba de contratar Xestur non son as primeiras que se
realizan nesta gran área empresarial. En setembro deste ano a empresa pública rematou a obra de
explanación da plataforma K-3 e o Eixo 0 do parque, cun investimento global de máis de 3,1 millóns
de euros.
A plataforma K-3 era a única que estaban sen explanar e a necesidade de realizar voaduras
fixeron que a obra tivera que realizarse antes de iniciar as correspondentes á primeira fase do
parque empresarial. Xunto coa explanación desta plataforma executouse tamén o Eixo 0 de Morás, que
permite o acceso á K-3 e garantirá a circulación de maneira ordenada e en condicións axeitadas de
seguridade polo ámbito unha vez se inicien as obras de urbanización interior do parque empresarial.
Tamén remataron o pasado verán os traballos de acondicionamento da estrada DP-0512 que
atravesa o parque empresarial e constitúe un dos seus viais, actuación para a que se mobilizou un
investimento de máis de 800.000 euros.
Accesos
Pola súa parte, a Consellería de Infraestruturas e Mobilidade, a través da Axencia de
Infraestruturas de Galicia, xa licitou as obras de acceso ao polígono, cun investimento de preto de
4,4 millóns de euros. Trátase da execución dun enlace deste parque coa estrada autonómica AC-551,
que consistirá na conexión do polígono empresarial coa A-6 e a AG-55 mediante un enlace tipo
trompeta de catro ramais.
A estrada AC-551 comunica o enlace entre a autoestrada AG-55 e a autovía A-6 coa AC-552, na
glorieta de Sabón, polo que o parque se atopa nun lugar óptimo para o acceso á rede viaria de alta
capacidade (AG-55, A-6, AP-9) e moi próximo ao Porto Exterior da Coruña.
As obras consistirán na execución dos catro ramais do enlace e dun paso superior sobre a
AC-551, sendo tamén necesaria a ampliación dun paso inferior baixo esta mesma estrada, que comunica
co lugar de A Ponte. Mantense o actual trazado en alzado da estrada AC-551.
O obxecto desta actuación é dotar ao parque empresarial de Morás que está a desenvolver a
empresa pública Xestur duns accesos que permitan o correcto desenvolvemento das actividades que se
localizarán no mesmo.