Inicio

Xunta de Galicia
Estás en ... Inicio » Sala de Comunicacion » Detalle dunha nova

Convocada a poxa públicade case 280.000 m2 na PLISAN con prezos “moi competitivos” que seguen a liña de bonificacións da Xunta

• A responsable autonómica salienta a importancia para o sur da Comunidade deste ámbito empresarial, que coa súa posición estratéxica e as condicións vantaxosas de acceso ás súas parcelas atraerá novos asentamentos industriais a esta zona
• Segundo o anuncio publicado hoxe no Diario Oficial de Galicia, o prazo para que as empresas presenten as súas ofertas ante o IGVS remata o vindeiro 31 de agosto
• Xunta e patronal analizan tamén a modificación do Plan sectorial de ordenación de áreas empresariais, que afectará directamente a sete concellos de Pontevedra
• Os cambios nos que se está a traballar permitirán incorporar preto dun millón de metros cadrados á planificación de novo solo empresarial nesta provincia

Vigo (Pontevedra), 3 de xuño de 2021.-
O Instituto Galego da Vivenda e Solo (IGVS) convocou hoxe unha poxa pública para sacar ao mercado a prezos competitivos case 280.000 metros cadrados repartidos en 39 parcelas na Plataforma Loxística e Industrial de Salvaterra de Miño-As Neves (Plisan), unha superficie á que poderán acceder as empresas interesadas tanto en réxime de compravenda como en dereito de superficie.

Así o anunciou esta mañá a conselleira de Medio Ambiente, Territorio e Vivenda, Ángeles Vázquez, que tras reunirse cos presidentes da Confederación de Empresarios de Galicia, Juan Manuel Vieites, e da Confederación de Empresarios de Pontevedra, Jorge Cebreiros, salientou a importancia desta nova poxa pública sobre a Plisan, a maior área empresarial do sur da Comunidade e promovida pola Xunta, Autoridade Portuaria de Vigo e Zona Franca.

Neste sentido, Vázquez Mejuto lembrou que é a segunda vez que se comercializa solo na área loxística empresarial da Plisan e que ao igual que na poxa convocada no ano 2019 —que se resolveu coa adxudicación de cinco parcelas— os prezos de venda serán “moi competitivos” co fin de facilitar ao máximo novos asentamentos empresariais.

“Conseguimos entre todos que salga solo a prezo bonificado na Plisan, tal e como vén establecendo a Xunta desde fai un tempo. É unha demanda que facemos a todos aqueles sectores do ámbito público que están desenvolvendo áreas empresariais, porque estas deben ser accesibles para os empresarios”, asegurou a conselleira tras a reunión, na que participaron tamén varios empresarios da provincia.

Así, explicou que na convocatoria deste ano o prezo base de saída do solo oscila entre os 53,21 €/m2 das parcelas de máis de 20.000 m2 e os 71,71 €/m2 do resto, unhas contías na liña dos prezos bonificados do solo empresarial da Xunta e que atribuíu ao traballo intenso realizado para comercializar a superficie dispoñible na Plisan a prezos competitivos.

Ademais, en caso de optar polo acceso en dereito de superficie —unha modalidade de adxudicación a cambio dun canon anual moi reducido e con opción de compra— o prezo mínimo fixado na poxa deste ano é de 0,79 €/m2.

Segundo o anuncio publicado no Diario Oficial de Galicia, as empresas interesadas en acceder ao solo da Plisan poden presentar as súas ofertas desde hoxe e ata o vindeiro 31 de agosto. En todos os casos deberán facelo por carta certificada a través das oficinas de Correos e dirixindo a documentación requirida aos servizos centrais do IGVS, en Santiago.

Modificación do Plan sectorial de áreas empresariais
A reunión entre a conselleira e os representantes da patronal tamén permitiu analizar o alcance que terá para Pontevedra a modificación do Plan sectorial de ordenación de áreas empresariais de Galicia (PSOAEG) na que traballa actualmente a Xunta.

Tras indicar que o IGVS está xa redactando o borrador do novo documento coa previsión de que poida iniciar a súa tramitación ambiental no mes de xullo, Ángeles Vázquez explicou que o que se busca é “reaxustar” ámbitos previstos que actualmente presentan problemas de viabilidade e ao mesmo tempo, atender as solicitudes municipais con relación ao desenvolvemento de novas áreas empresariais nos seus territorios.

No caso concreto da provincia de Pontevedra, indicou que a revisión do PSOAEG beneficiará directamente a sete concellos e á súa área de influencia, incorporando preto dun millón de metros cadrados á planificación de novo solo empresarial na provincia que non están contemplados no documento vixente.

Entre as novidades máis destacadas que se introducirán coa actualización do plan, referiuse á ampliación en case 162.000 m2 da superficie prevista do parque empresarial de Toedo, na Estrada; á inclusión no plan dun ámbito novo de preto de medio millón de metros cadrados que permitiría ampliar A Veigadaña cara ao concello limítrofe de Redondela; á ampliación do polígono vigués de Balaídos en máis de 166.000 m2; ou á delimitación dun novo solo empresarial de preto de 145.000 m2 en Mondariz.

Cómpre lembrar que esta é a segunda vez que a Xunta modifica o PSOAEG desde a súa aprobación no ano 2014. Así, ao igual que ocorreu coa revisión acometida en 2018, o obxectivo é adaptar o máximo posible o contido do plan ás necesidades reais de solo industrial de cada zona de Galicia, co fin de que dispoñer dunha ferramenta de planificación útil e actualizada que se adapte á demanda de superficie para usos industriais existente.

Por último, conselleira e patronal tamén falaron sobre a futura Lei de áreas empresariais de Galicia, da que a Xunta xa conta cun texto articulado e para cuxa elaboración, indicou Ángeles Vázquez, quere contar coa “opinión” e o “traballo” do tecido empresarial galego