• Ángeles Vázquez subliña a importancia desta liña de subvencións, que axudou a mobilizar 87
vivendas de titularidade municipal para aluguer en 32 municipios
• Durante unha visita ao Concello de Oia, a conselleira comprobou o resultado das obras de
recuperación acometidas en dous inmobles, nos que a Xunta investiu case 75.000 euros ao abeiro da
convocatoria do ano pasado
Oia (Pontevedra), 8 de outubro de 2019-. A Consellería de Medio Ambiente,
Territorio e Vivenda axudou a unha trintena de concellos nos últimos tres anos a recuperar e
rehabilitar para destinalas a aluguer 87 antigas vivendas de mestres e outros oficios de
titularidade municipal. Así o subliñou esta mañá durante unha visita a Oia a conselleira Ángeles
Vázquez, quen recoñeceu a súa satisfacción co funcionamento deste programa, xestionado a través do
Instituto Galego da Vivenda e Solo (IGVS) e que cada ano esperta unha maior aceptación e interese
entre os concellos de menos de 20.000 habitantes aos que vai dirixido.
O éxito destas axudas reflíctese na súa propia evolución nos últimos tres anos, nos que
practicamente se quintuplicou a cifra de entidades locais beneficiarias. Así, se en 2017 foron
catro os concellos nos que se actuou a través desta novidosa liña de axudas, ao ano seguinte a
cifra elevouse ata 15 e xa na última convocatoria, correspondente ao actual exercicio, foron 18 os
municipios que se acolleron á subvención.
O Concello de Oia, que tamén está adherido ao programa de vivendas baleiras da Xunta, foi un
dos beneficiarios da orde de axudas para a rehabilitación das chamadas casas de mestres, outros
oficios e edificios de titularidade municipal convocada en 2018. Neste sentido e tras comprobar o
resultado dos traballos realizados en dúas vivendas do barrio de Loureza, Ángeles Vázquez explicou
que grazas á subvención de 74.500 euros concedida polo seu departamento para financiar esta
actuación, dúas familias de Oia poderán acceder ás mesmas cunhas condicións de aluguer moi
vantaxosas.
“Quero poñer en valor a importancia desta liña de axudas para a rehabilitación de vivendas de
titularidade municipal xa que permite que as entidades locais, con menor poder adquisitivo, poidan
acometer actuacións desta envergadura”, declarou a conselleira, que salientou tamén os 3,2 millóns
de euros mobilizados pola Consellería de Medio Ambiente a través das tres últimas convocatorias do
programa de vivendas de mestres, incrementando sempre as partidas destinadas ao mesma con respecto
á anualidade anterior.
En todo caso, Vázquez Mejuto incidiu en que esta liña de subvencións non é a única que pon o
IGVS nestes momentos a disposición dos concellos. Deste xeito, referiuse aos préstamos que se
ofertan a través do Fondo de Cooperación, uns cartos que os concellos poden destinar á compra de
novos inmobles para rehabilitar ou ben a completar a totalidade do orzamento necesario para
recuperar vivendas que xa son da súa titularidade.
O obxectivo da Xunta, engadiu, pasa por fomentar a creación dun parque de vivenda pública en
aluguer municipal para que, incluso aqueles concellos con menos recursos e orzamento, poidan
ofrecer aos seus veciños inmobles axeitados para convertelos no seu fogar.
Por último, a conselleira enmarcou estes esforzos por axudar ás entidades locais a financiar
a recuperación de vivendas de titularidade municipal no espírito da nova Lei de Rehabilitación,
Rexeneración e Renovación urbana, a primeira destas características coa que conta a comunidade e
que entrou en vigor o pasado 22 de maio.
Así, lembrou que o obxectivo básico desta norma é loitar contra o abandono e o desuso do
patrimonio xa construído, ofrecendo as ferramentas máis axeitadas para potenciar a súa
rehabilitación pola vía da simplificación administrativa e da creación de novos instrumentos, como
as áreas Rexurbe, que permitirán ofrecer unha resposta integral á situación que presentan os
ámbitos urbanos especialmente degradados e que precisan dunha rápida intervención para garantir a
súa reactivación.