- Obteranse tres vivendas e investirase preto de medio millón de euros.
- O IGVS xa está rehabilitando o edificio emprazado no número 2 da rúa do Vilar.
- Tamén se atopan en construción oito vivendas de promoción pública en Covadonga.
- Finalmente, en marzo licitouse a obra de construción de tres vivendas no número 14 da rúa
Cervantes.
Santiago de Compostela, 12 de maio de 2018.- A Xunta de Galicia adxudicou o
contratod e obra para a rehabilitación de dous inmobles emprazados nos números 3 e 5 da rúa do
Vilar, en Ourense, nos que se obterán tres vivendas unha vez rehabilitados.
O investimento a realizar polo Instituto Galego da Vivenda e Solo (IGVS) na rehabilitación
será de 493.460 euros e o prazo de execución das obras será de 12 meses dende o inicio das obras.
Actualmente o IGVS está a rehabilitar o edificio emprazado no número 2 da rúa do Vilar, no
que inviste 373.662,45 euros e no que se obterán dúas vivendas. Esta obra foi iniciada no pasado
mes de abril e ten un prazo de execución de doce meses.
Ademais, o IGVS está edificando oito vivendas de nova construción no barrio de Covadonga, cun
investimento de 789.800 euros. Como no caso anterior, as obras iniciáronse no pasado mes de abril e
teñen un prazo de execución de doce meses.
Finalmente, en marzo pasado foi licitada a construción de tres novas vivendas de promoción
pública e un local no número 14 da rúa Cervantes, no que se prevé investir 650.710,42 euros.
As obras de rehabilitación no casco vello de Ourense continuarán coas actuacións que se
realicen nos inmobles que o IGVS adquira na cidade despois da oferta pública de adquisición
realizada no pasado mes de febreiro e para a que recibiu catro ofertas, emprazadas nas rúas Pelaio,
Manuel Sueiro, Cervantes e Dous de Maio, por importe de 753.697 euros. Actualmente o IGVS está
comprobando a documentación presentada e posteriormente realizarase unha taxación dos inmobles.
Prevese que as escrituras de compravenda dos inmobles que se adquiran se asinen nos meses de
setembro ou outubro para de seguido redactar os proxectos de rehabilitación.