• Como resultado da poxa pública convocada polo IGVS o ano pasado, correspondeulle á firma
galega unha superficie de 63.000 metros cadrados de solo
• Tamén se adxudicaron outras dúas parcelas, que suman preto de 5.600 metros
Santiago de Compostela, 3 de novembro de 2020-. A Xunta de Galicia, a empresa Hijos
de Carlos Albo, a Autoridade Portuaria de Vigo e o Consorcio da Zona Franca asinaron esta mañá as
escrituras polas que se formaliza a adxudicación de tres parcelas na Plataforma Loxístico
Empresarial de Salvaterra de Miño-As Neves (Plisan) á firma conserveira.
A empresa conserveira Hijos de Carlos Albo resultou adxudicataria de tres parcelas na Plisan
cunha superficie total de 62.979,54 metros cadrados como resultado da poxa pública convocada polo
Instituto Galego de Vivenda e Solo (IGVS) o ano pasado. A adxudicación realizouse en dereito de
superficie, unha modalidade que permite ás empresas acceder ao solo pagando cada ano una pequena
cantidade, o que lles facilita financiar a súa instalación e o inicio da actividade nas mellores
condicións posibles.
En concreto, supón o pago dun canon anual do 1,5% do prezo da parcela durante os dous
primeiros anos, do 2,5% do prezo nos anos terceiro e cuarto e do 3,5% do prezo a partir do quinto
ano. O dereito de superficie concédese por un prazo de 30 anos e ao finalizar este período, as
entidades promotoras da Plisan, mediante acordo unánime e previa petición do adxudicatario, poderán
conceder ata un máximo de tres prórrogas sucesivas, cunha duración de 10 anos cada unha, de maneira
que o dereito de superficie poderá estenderse ata un máximo de 60 anos.
Posteriormente, os adxudicatarios poderán adquirir a propiedade da parcela se o desexan. Para
estes efectos, o prezo de venda será durante os cinco primeiros anos, o prezo de remate polo que se
lle adxudicou o dereito de superficie; e nos anos seguintes, o importe sobre o que se estea
calculando o canon no momento no que se comunique ás entidades promotoras a vontade de exercer o
dereito de adquisición da parcela.
Se a adquisición se realizase durante os 10 primeiros anos de vixencia do dereito de
superficie, descontarase do prezo de venda o 40% das cantidades satisfeitas ata ese momento en
concepto de canon.
Dúas parcelas máis adxudicadas
Ademais das parcelas asignadas a Albo, na Plisan tamén se adxudicaron outras dúas parcelas,
de maneira que a superficie total adxudicada se aproxima aos 69.000 metros cadrados. En todos os
casos, o solo foi adxudicado en réxime de dereito de superficie.
Cómpre lembrar que na Plisan xa están rematadas as obras de urbanización da primeira fase dos
sistemas xerais, a primeira fase da zona LE (Loxístico empresarial), así como a estación depuradora
de augas residuais (EDAR) -recibida recentemente polo IGVS-.
Así mesmo, antes de finais deste ano está previsto tamén que rematen as obras de construción
da estación de tratamento de auga potable (ETAP).