• A conselleira de Medio Ambiente, Territorio e Vivenda demanda á Administración local que
proceda coa expropiación de inmobles, co fin de rehabilitalos e facilitar fogares aos veciños
• A Xunta de Galicia leva investido máis de 27 millóns de euros na recuperación do Casco
Vello de Vigo
• Ángeles Vázquez visitou esta mañá as obras de rehabilitación do inmoble ubicado no número
12 da rúa Cruz Verde, para o que está aberto o prazo de inscrición para optar á compra das dúas
vivendas entre os inscritos no Rexistro de Demandantes
Vigo, 5 de outubro de 2020.- A conselleira de Medio Ambiente, Territorio e
Vivenda, Ángeles Vázquez, solicitou ao Concello de Vigo unha maior implicación nas xestións
necesarias para adquirir novos inmobles para rehabilitar no Casco Vello. Así o puxo de manifesto
durante unha visita ás obras de rehabilitación do inmoble ubicado no número 12 da rúa Cruz Verde,
onde recordou que o Casco Vello de Vigo é un proxecto ao que hai que darlle continuidade para que
esta zona cobre valor e vida.
Nese sentido, explicou que o Concello debe poñer interese e vontade e facilitarlle ao
Consorcio a adquisición de varios inmobles, pois hai varios nos que se ten interese e -por diversas
circunstancias- non se poden adquirir, o que impide a rehabilitación desexada; polo que é preciso
que o Concello proceda a expropiar os inmobles e continuar coa recuperación.
Destacou o valioso traballo de recuperación edificatoria e patrimonial que está a realizar o
Consorcio do Casco Vello, onde a participación da Xunta é do 90% e a do Concello de Vigo do 10%,
polo que os investimentos realizados permiten facilitar o acceso a unha vivenda ás familias e
recuperar a vida dos centros históricos e de zonas degradadas das cidades.
A conselleira recordou que a Consellería de Medio Ambiente, Territorio e Vivenda leva
investidos 27 millóns de euros na rehabilitación do Casco Vello de Vigo e a anualidade de 2020
duplicou a realizada en 2019. Engadiu que desde o ano 2005 o Consorcio rehabilitou un total de 108
vivendas e 33 locais.
Na actualidade, no Casco Vello estanse a realizar obras de rehabilitación de 15 vivendas e 3
locais, por un importe de 2,82 millóns de euros, na zona alta do Casco Vello e na zona do Berbés.
Explicou que a estas vivendas hai que sumar os inmobles visitados esta mañá na rúa Cruz
Verde, que se atopan nunha ubicación privilexiada moi preto da Porta do Sol. Aclarou que as obras
remataron este verán, polo que xa está aberto o prazo de inscrición para optar á compra destas dúas
vivendas e un local comercial - ata o próximo 13 de outubro- entre todos os interesados que se
atopen inscritos no Rexistro de demandantes de Galicia.