• A conselleira Ángeles Vázquez e o alcalde Gabriel Alén mantiveron hoxe unha reunión de
traballo durante a que o rexedor ourensán lle presentou as bases deste proxecto integral, que ten
como obxectivo atraer e fixar poboación no municipio
Santiago de Compostela, 31 de xullo de 2019-. A Consellería de Medio Ambiente, Territorio e
Vivenda estudará a posibilidade de colaborar economicamente co concello ourensán de Cenlle nun
proxecto experimental para rehabilitar as antigas escolas do municipio e poñelas a disposición dos
veciños para uso residencial. Este foi o compromiso que asumiu a conselleira Ángeles Vázquez co
alcalde de Cenlle, Gabriel Alén, con quen mantivo esta mañá unha reunión de traballo na que
abordaron este e outros asuntos de interese municipal relativos a áreas da súa competencia.
Tras incidir en que o obxectivo é atraer e fixar poboación no municipio, o rexedor resaltou
que a iniciativa terá unha dobre vertente xa que a rehabilitación das escolas como vivendas
combinarase cun programa formativo para que os participantes poidan achegarse e aprender a realizar
distintos labores tradicionais propios desta zona.
Pola súa parte, a conselleira de Medio Ambiente comprometeuse a que o Instituto Galego da
Vivenda e Solo buscará e analizará posibles vías de colaboración co concello para levar a cabo unha
iniciativa pioneira e integral que vai na mesma liña de revitalización do rural que defende o seu
departamento, con medidas e distintas liñas de axudas en materia de vivenda e rehabilitación
dirixidas especificamente aos concellos.
Neste sentido, referiuse á liña de subvencións para a rehabilitación de antigas vivendas de
mestres, outros oficios e outras de titularidade municipal convocada o pasado mes de febreiro cunha
dotación de preto de 2 millóns de euros. O seu obxectivo é facilitar aos municipios pequenos e que
contan con veciños inscritos no Rexistro de Demandantes de Vivenda de Galicia a creación dun parque
público de vivenda municipal destinada ao alugueiro, ao tempo que fomenta a rehabilitación de
inmobles xa existentes.
