- A conselleira salienta a incidencia positiva do Plan de dinamización do solo empresarial na
Central de Transportes de San Cibrao das Viñas, onde só quedan 3 parcelas por vender
- Lembra que o Goberno galego elevou as bonificacións sobre o prezo do solo ata o 50% na
provincia de Ourense, co obxectivo de impulsar as novas oportunidades investimento
- Salienta a aposta do Goberno autonómico por San Cibrao das Viñas como unha das grandes
áreas empresariais de Galicia, como demostra o investimento de 22 millóns de euros na nova conexión
do Polígono coa A-52
- Destaca que esta vía de nova construción que se está a executar permitirá reducir en ata
un 60% a distancia entre o Polígono de San Cibrao e as autovías das Rías Baixas e
Ourense-Celanova
San Cibrao das Viñas (Ourense), 17 de xullo de 2018.- A conselleira de
Infraestruturas e Vivenda, Ethel Vázquez, salientou hoxe que os incentivos incluídos no Plan de
dinamización do solo empresarial de Galicia activado pola Xunta impulsou, desde o ano 2015, a
adxudicación de 140.000 metros cadrados de superficie en polígonos da provincia de Ourense. “Desde
o ano 2015 o solo empresarial da Xunta en Ourense véndese á metade de prezo”, lembrou a conselleira
no acto de inicio das obras das novas instalacións e centro loxístico do Grupo Cuevas, que adquiriu
a prezo bonificado unha parcela de 32.000 metros cadrados na Central de Transportes de San Cibrao
das Viñas.
Ethel Vázquez, que estivo acompañada da delegada da Xunta en Ourense, Marisol Díaz Mouteira,
subliñou o interese da Xunta por facilitar novos investimentos e nova actividade económica e
xeración de emprego. Ese obxectivo, apuntou, foi o que motivou a activación a comezos de 2015 do
Plan de dinamización do solo empresarial de Galicia.
Explicou que con esa ferramenta puxéronse á disposición dos empresarios novas fórmulas de acceso
ao solo, entre as que destaca o dereito de superficie, unha especie de alugueiro a prezo reducido
con dereito a compra, que representa unha fórmula interesante para reducir os riscos aos que se ven
obrigados os empresarios.
A conselleira chamou especialmente a atención sobre as importantes bonificacións sobre os prezos
de venda do solo empresarial que foron do 30% con carácter xeral pero que se levaron ata o 50% en
zonas como a provincia de Ourense, nas que a Xunta entende que cómpre dar un maior impulso para
aproveitar as oportunidades de desenvolvemento.
Esas bonificacións da metade do prezo do solo na provincia de Ourense permitiu a adxudicación
dos 140.000 metros cadrados que, na práctica, supoñen un investimento da Consellería de
Infraestruturas e Vivenda en Ourense de 4,5 millóns de euros. Trátase, afirmou a conselleira, “dun
importante impulso económico á provincia pola creación de emprego e o dinamismo económico achegado”.
Ethel Vázquez destacou a positiva incidencia desa política de incentivos na Central de
Transportes de San Cibrao das Viñas onde, tras a adquisición do Grupo Cuevas, só restan 3 parcelas
por vender.
A conselleira de Infraestruturas e Vivenda mostrouse convencida de que ese gran esforzo
financeiro e de xestión administrativa pagou a pena, e puxo como proba a importante aposta asinada
polo Grupo Cuevas coa ampliación das súas instalacións en San Cibrao das Viñas.
Asegurou que o Goberno galego é consciente de que San Cibrao das Viñas é unha das maiores áreas
comerciais de Galicia e por ese motivo o seu compromiso de apoio ás empresas que operan aí vai máis
alá dos incentivos ao solo empresarial.
A ese respecto, referiuse á nova conexión do polígono de San Cibrao das Viñas coa Autovía das
Rías Baixas, a A-52, que se atopa actualmente en plena execución grazas a un investimento da Xunta
de Galicia de preto de 22 millóns de euros.
Será, lembrou, unha vía de novo trazado de 4,5 quilómetros de lonxitude, deseñada cos parámetros
máis exixentes -carrís anchos, beiravías amplas e terceiro carril no 50% do percorrido-, que
permitirá reducir en ata o 60% a distancia entre o Polígono e a Autovía das Rías Baixas e coa de
Ourense-Celanova.