Inicio

Xunta de Galicia
Estás en ... Inicio » Sala de Comunicacion » Detalle dunha nova

A XUNTA ADXUDICA AS OBRAS DE REHABILITACIÓN DUN INMOBLE EMPRAZADO NO NÚMERO 14 DA RÚA CERVANTES, NO CONCELLO DE OURENSE, CUN INVESTIMENTO DE MÁIS DE 581.000 EUROS

- Esta nova intervención, que conta cun prazo de execución de 12 meses, permitirá dispor dun edificio con tres vivendas e un local
- Neste intre a Consellería de Infraestruturas e Vivenda ten en marcha na cidade a rehabilitación de inmobles na rúa do Vilar, números 2, 3 e 5, que supoñen un investimento que suma preto de 868.000 euros
- Tamén se atopan en construción 8 novas vivendas de promoción no barrio de Covadonga, cunha inversión de 790.000 euros
- Actualmente avalíanse as ofertas de adquisición de 4 edificios no centro histórico, emprazados nas rúas Pelaio, Manuel Sueiro, Cervantes e Dous de Maio


Santiago de Compostela, 14 de xullo de 2018.- A Consellería de Infraestruturas e Vivenda vén de adxudicar esta semana o contrato para a rehabilitación dun inmoble emprazado no número 14 da rúa Cervantes, no Concello de Ourense, cun investimento de máis de 581.000 euros.

Esta intervención, que conta cun prazo de execución de 12 meses dende o inicio das obras, permitirá dispor dun edificio rehabilitado con tres vivendas e un local.

Subliñar que actualmente na cidade das Burgas a consellería tamén está a rehabilitar outros inmobles.

Este pasado mes de abril iniciáronse as obras no número 2 da rúa do Vilar que, cun investimento de preto de 374.000 euros e un prazo de execución de 12 meses, permitirá habilitar dúas vivendas. E en xuño iniciáronse as obras de rehabilitación de Vilar 3 e 5, cun investimento de preto de 494.000 euros.

Ademais, a consellería está edificando oito vivendas de nova construción no barrio de Covadonga, cun investimento de preto de 790.00 euros. Estas obras comezaron neste pasado mes de abril e teñen un prazo de execución de 12 meses.

Programa Rexurbe
As obras de rehabilitación no casco histórico de Ourense continuarán coas actuacións nos inmobles que a Xunta adquira, como resultado da oferta pública de adquisición realizada no pasado mes de febreiro.

No marco do programa Rexurbe, co que a Xunta traballa na recuperación de cascos históricos de diferentes vilas e cidades galegas, na cidade de Ourense presentáronse 4 ofertas para a adquisición de edificios, por importe de preto de 754.000 euros, emprazándose os inmobles ofertados nas rúas Pelaio, Manuel Sueiro, Cervantes e Dous de Maio.

Actualmente os técnicos do Instituto Galego de Vivenda e Solo están comprobando a documentación presentada polos actuais donos e, posteriormente, realizarase unha taxación dos citados inmobles.