- As empresas interesadas nestas actuacións poderán presentar as súas ofertas ata o vindeiro 27
de marzo
- Seis das vivendas sobre as que a Xunta vai actuar están emprazadas en Vila da Igrexa e as
outras seis en Felgoso
- As obras consistirán no illamento do edificio polo exterior para mellorar a eficiencia
térmica e incrementar o rendemento do consumo enerxético
- O Goberno galego ten en marcha un programa de mellora da eficiencia enerxética de vivendas
de promoción pública, co que se están a realizar actuacións en localidades como Santiago de
Compostela, Pontevedra, Melide, Vigo ou Becerreá
Santiago de Compostela, 1 de marzo de 2018.- A Xunta de Galicia publica hoxe no
Diario Oficial de Galicia (DOG) a licitación das obras de mellora da eficiencia enerxética de 12
vivendas de promoción pública en Cerdido, cun investimento de case 400.000 euros.
Seis das vivendas sobre as que a Xunta vai actuar están emprazadas en Vila da Igrexa e as
outras seis en Felgoso, todas no concello coruñés de Cerdido.
Estas actuacións están cofinanciadas polo Fondo Europeo de Desenvolvemento Rexional (Feder)
no marco do programa operativo Feder-Galicia 2014-2020. O prazo de execución das obras será de
catro meses dende o inicio das mesmas. As empresas interesadas dispoñen de 26 días naturais para
presentar as súas ofertas, polo que a data límite é o vindeiro 27 de marzo, tal como se indica no
DOG:
https://goo.gl/PiFwmE
As obras consistirán no illamento térmico do edificio polo exterior para mellorar a súa
eficiencia térmica e, polo tanto, incrementar o rendemento do consumo enerxético realizado nas
mesmas. Para iso empregarase o sistema SATE, que permite realizar o illamento dun edificio pola
parte exterior do mesmo, eliminando pontes térmicas, mellorando o illamento térmico e a
impermeabilidade da edificación sen reducir o espazo interior das vivendas nin modificar o aspecto
exterior do inmoble
O Goberno galego ten en marcha un programa de mellora da eficiencia enerxética de vivendas de
promoción pública, no marco do cal se están a realizar actuacións en varias localidades de toda
Galicia, como Santiago de Compostela, Pontevedra, Melide, Vigo ou Becerreá.
Estas actuacións teñen unha importante repercusión positiva na mellora da calidade de vida
dos veciños e no aforro enerxético e enmárcanse na aposta que desde a Xunta se está a facer pola
rehabilitación de vivendas.