-
O municipio, que destinará este investimento a rehabilitar varios inmobles
tradicionais en ruínas das que se obterán catro vivendas para residentes no concello, disporá de 8
anos para reintegrar o importe, sen ningún tipo de interese
- Vázquez Mourelle explica que este fondo diríxese aos municipios de menos de 50.000
habitantes aos que se lle conceden préstamos a interese cero para que recuperen edificacións ou
realicen intervencións en materia de rehabilitación
- Indica que esta iniciativa incentiva e implica aos municipios na recuperación e posta en
valor de edificacións ou zonas emblemáticas para o uso e desfrute dos veciños e convídaos a
solicitar esta liña de crédito ata finais deste mes
- Lembra que a Xunta ten en marcha outras axudas como as das ARIS ou para a infravivenda
rural ou as axudas para rehabilitar as antigas vivendas de mestres ou inmobles de titularidade
municipal para o seu destino a alugueiro social
Ourense, 3 de outubro de 2017.- A conselleira de Infraestruturas e Vivenda, Ethel Vázquez, xunto coa delegada
territorial da Xunta en Ourense, Marisol Díaz, asinou hoxe coa alcaldesa de Parada do Sil, Yolanda
Jácome, un convenio mediante o que o Goberno galego lle concederá un préstamo de 602.000 euros sen
xuros para a rehabilitación de varias construcións no lugar de Fondo de Vila.
Trátase do
primeiro convenio de Galicia asinado que permite a un concello acceder ao fondo de cooperación para
a rehabilitación. Neste caso, o municipio deberá reintegrar este importe nun prazo de 8 anos a
custo cero, sen ningún tipo de interese.
A actuación
que quere executar o Concello é a proposta gañadora dun concurso de ideas, convocado polo propio
Concello en colaboración co Colexio Oficial de Arquitectos de Galicia e consiste na rehabilitación
de varias construcións tradicionais en ruínas das que se obterán catro vivendas que serán
destinadas a residentes no municipio, xunto co acondicionamento de todo o seu contorno.
O Fondo de
cooperación para a rehabilitación é unha nova medida da Xunta que está dirixida aos municipios de
menos de 50.000 habitantes e que consiste na concesión de préstamos a interese cero para que poidan
recuperar edificacións ou realizar outras intervencións en materia de rehabilitación. En total esta
iniciativa está dotada con 10 millóns de euros, o que vai permitir rehabilitar unhas 1.500 vivendas
en toda Galicia.
A Xunta
publicou no mes de xullo no Diario Oficial de Galicia a convocatoria na que se fixaban as
condicións e os criterios para o acceso a esta liña de financiamento e se abría o prazo para a
presentación de solicitudes por parte dos concellos interesados. Os municipios deben asinar
cadanseu convenio de financiamento no que se fai constar as actuacións que van desenvolver, e se
concreta tanto a contía da que van dispoñer, como o prazo e as condicións de reintegro da cantidade
percibida.
A titular
de Infraestruturas indicou que esta medida pretende incentivar e implicar aos municipios galegos na
recuperación e posta en valor de edificacións ou zonas emblemáticas das novas vilas para o uso e
desfrute dos veciños.
Condicións vantaxosas
Ethel
Vázquez explicou que a Xunta é consciente das limitacións que poden ter certos concellos á hora de
levar a cabo este tipo de actuacións, de aí estas condicións tan vantaxosas con préstamos a
interese cero.
O Goberno
galego está traballando con outros concellos como A Peroxa, O Barco de Valdeorras ou A Gudiña, que
xa teñen presentado a súa solicitude ou amosado interese por acceder a este fondo de
financiamento.
Vázquez
Mourelle indicou que o seu departamento agarda que o exemplo de Parada de Sil anime a outros
municipios galegos a solicitar esta liña de crédito, xa que teñen de prazo aínda ata finais deste
mes, para actuar e recuperar edificacións emblemáticas dos seus cascos históricos ou realizar
outras intervencións singulares en materia de rehabilitación.
A
conselleira lembrou que a esta liña de axudas á rehabilitación dirixida aos concellos cómpre sumar
outras como as subvencións para as ARIS ou para a infravivenda rural, xa activadas en anos pasados.
Concretou que este ano tamén se engadiron axudas para rehabilitar as antigas vivendas de mestres ou
inmobles de titularidade municipal para o seu destino a alugueiro social.
A Xunta
está a apostar por unha estratexia de rehabilitación que se centra na colaboración cos concellos,
por sumar esforzos entre administracións para conservar e protexer o patrimonio arquitectónico, ao
tempo que se dá resposta ás necesidades de vivenda dos cidadáns.