Santiago, 23 de xuño de 2009.- O conselleiro de Medio Ambiente, Territorio e
Infraestruturas, Agustín Hernández, anunciou no Parlamento de Galicia o rexeitamento ao Parque
Medioambiental de Carballeda de Avia en Ourense, iniciativa conxunta das consellerías do bipartito
de Medio Ambiente e de Vivenda e Solo, actuando esta última como promotora. Hernández fixo estas
declaracións no transcurso da sesión de pleno que se celebrou esta tarde na Cámara galega. Agustín
Hernández suliñou que o Goberno galego vai anular este proxecto que “conta co rexeitamento
manifesto da maioría social e mesmo dos técnicos do organismo encargado da súa promoción”. Na súa
comparecencia, o responsable de Medio Ambiente da Xunta asegurou que, tal como quedaron as cousas,
Goberno galego non cree que exista a necesidade de pechar este proxecto, porque esta actuación xa
estaba paralizada polo seu promotor, a anterior Consellería de Vivenda e Solo, desde decembro de
2008, xa que consideraba inviable esta actuación. Agustín Hernández incidiu en que o Goberno
bipartito tratou de vender fume con proxecto e, “unha vez máis actuou de costas ao interese da
maioría dos veciños” e insiste en que “tras ver que os seus propios técnicos rexeitaban o proxecto
metérono nun caixón, como ocorre noutros asuntos como o do AVE, quedaron caladiños, deixándolle
outro “morto” máis ao novo Goberno”. Na súa intervención, o máximo responsable de Medio Ambiente do
Goberno galego anunciou que dende a Xunta de Galicia estase a traballar nun plan de residuos que
acade o mellor consenso posible e resolva os problemas existentes. O informe do bipartito Hernández
concretou que son moitos os datos que ofrece o informe da Dirección Técnica de Solo do IGVS do 23
de decembro de 2008, que conclúe que o proxecto é inviable, entre outros: - A autovía A-52 atravesa
o ámbito de actuación dividíndoo en dúas partes, una ao norte e outra ao sur da mesma. O Ministerio
de Fomento propón un enlace coa autovía a través da N-120, cun custe aproximado de 15 millóns de
euros. O informe do IGVS di que se esta é a única solución para a conexión viaria se debería
reconsiderar a ubicación do parque. - A topografía dos terreos onde se pretende emprazar o parque é
moi complicada, existindo un desnivel de aproximadamente 50 metros entre as cotas superior e
inferior. Estímase que o custe de movemento de terras pode representar o 40% do total do custe de
urbanización interna do parque. - As condicións do terreo, a presenza da autovía cruzando o ámbito
e outros viais de acceso a Carballeda de Avia fan que a superficie dedicada a parcelas de uso
industrial sexa un porcentaxe moi baixo do total do ámbito, polo que o prezo estimado de venda por
metro cadrado supera os 100 euros, moi alto para a zona. - Importante impacto paisaxístico. - Alto
custe das conexións exteriores de electricidade, abastecemento e saneamento: o Para o abastecemento
de auga habería que facer unha nova captación no río Miño, cunha estación de bombeo a máis de cinco
quilómetros do parque empresarial. o Para o saneamento sería preciso a construción dunha nova EDAR
para 6.000 habitantes equivalentes. o Para o subministro de enerxía eléctrica habería que instalar
una liña de media tensión soterrada dende a subestación de Castrelo do Miño, a máis de cinco
quilómetros de distancia. Resume do proxecto Segundo os datos dispoñibles o obxectivo dese proxecto
sectorial era a creación dun gran polígono ambiental centrado no tratamento e reciclaxe de residuos
no sur de Galicia, nunha superficie dunhas de 80 hectáreas, no concello ourensán de Carballeda de
Avia. As razóns que alegou o anterior Goberno para a elección do lugar eran, entre outras, a súa
situación estratéxica, a súa boa comunicación, a existencia dun PXOM do término municipal e a
posibilidade de ofrecer a superficie requirida. A idea era que se asentaran alí, entre outras,
plantas de tratamento de residuos sólidos urbanos, aceites vexetais e animais, aparellos
electrónicos, disolventes, metais e compostos metálicos, pneumáticos fóra de uso, papel e cartón,
plásticos, tóner e cartuchos de tinta ou ácidos. Para levar a cabo o proxecto, en marzo de 2007 –h
ai máis de dous anos- asinouse un convenio entre as dúas consellerías mencionadas –Medio Ambiente e
Vivenda-, Xestur Ourense e o propio concello de Carballeda de Valdeorras. A Consellería de Vivenda
estimaba o custo total do Parque nuns 40 millóns de euros. Segundo o convenio o investimento para o
2007 ascendía a 4 millóns de euros. O 17 de decembro de 2007 o IGVS presentou a comunicación do
inicio do procedemento de elaboración do Proxecto Sectorial do Parque Empresarial. O 3 de xaneiro
de 2008 a D.X. de Desenvolvemento Sostible concluíu que o proxecto podería ter efectos negativos
sobre o medio natural, polo que tería que someterse ao procedemento avaliatorio. O 14 de abril de
2008 a D.X. de Desenvolvemento Sostible emitiu o Documento de Inicio, sen que desde entón (abril
2008) se tivera recibido máis comunicación en referencia a este proxecto, continuando a día de hoxe
á espera de que o IGVS remitira a documentación para a realización da memoria ambiental. Pola súa
parte, o IGVS, organismo promotor das obras, non someteu a información pública o Proxecto Sectorial
e paralizou a súa tramitación, seguindo as indicacións do informe da súa Dirección Técnica de Solo,
que o 23 de decembro de 2008 considera inviable esta actuación.
SAÚDOS,
GABINETE DE COMUNICACIÓN DA CONSELLERÍA DE MEDIO AMBIENTE, TERRITORIO E INFRAESTRUTURAS