-  O DOG publica hoxe a orde que as regula para este ano

-  Poderán beneficiarse as vivendas que xa conten con calificación definitiva

-  As axudas por vivenda van de 2.000 a 3.500 euros, segundo o nivel de cualificación enerxética

-  Os adxudicatarios beneficiaranse dun menor custe enerxético das súas vivendas

 

Santiago, 18 de xuño de 2012.- A Xunta de Galicia destinará 2.449.417,88 euros a incentivar a eficiencia enerxética dos edificios de vivendas protexidas de nova construción, segundo establece a Orde que publica hoxe o Diario Oficial de Galicia e que establece as normas para a concesión de ditas axudas. Os beneficiarios finais das actuacións serán os adxudicatarios, que recibirán vivendas cunha maior eficiencia, o que repercutirá nun menor custe enerxético para os mesmos.

 

Poderán acollerse a estas axudas as persoas físicas ou xurídicas promotoras de vivendas de nova construción que, á data de publicación desta orde, conten coa cualificación definitiva de vivendas protexidas ao abeiro do Plan de Vivenda e Rehabilitación 2009-2012, cuxos proxectos obteñan unha cualificación enerxética da clase A, B ou C. Segundo o establecido no Real decreto 47/2007, de 19 de xaneiro, polo que se aproba o procedemento básico para a certificación de eficiencia enerxética de edificios de nova construción, a devandita certificación enerxética é expedida pola Consellería de Economía e Industria.

 

Non poderán acceder a estas axudas os promotores de aloxamentos protexidos nin de vivendas rehabilitadas. Nin tampouco se poderá acceder a estas axudas respecto a aquelas vivendas para as cales xa se concedera a subvención en anos anteriores. A contía da axuda que se conceda en cada caso dependerá do nivel de cualificación enerxética. Así:

 

1.- para o nivel A corresponderán 3.500 euros por vivenda

b.- para o nivel B, 2.800 euros por vivenda

c.- para o nivel C, 2.000 euros por vivenda

 

A contía máxima das axudas nesta convocatoria é de 2.449.417,88 euros. O prazo de presentación de solicitudes é dun mes, contado a partir de mañá. As solicitudes dirixiranse á xefatura da área provincial do Instituto Galego da Vivenda e Solo (IGVS) da provincia na que se emprace a promoción.

 

Estas axudas son incompatibles, sempre que se dirixan á mesma finalidade, coas correspondentes ao Plan de Acción de Aforro e Eficiencia Enerxética para o período 2008-2012, e ao Plan de Enerxías Renovables 2005-2012, do Instituto para a Diversificación e Aforro da Enerxía (IDAE).